Димитар Кондовски е еден од малкутемина македонски ликовни уметници чие творештво остави траен белег во времето. Неговото дело е широко во својот опфат и длабоко според својот мисловен дофат. Златната трага што тој ја врежа во скаменетото време е чудесен сложен орнамент чија тајна уште не е откриена.
Фасцинацијата на Кондовски со илустрацијата започнува во неговото детство и со првите сликовници и илустрирани книги кои ги добива од својот татко. Чудесниот свет на бајките и на сликовниците засекогаш ќе остане дел од него и неговата ликовна поетика овозможувајќи му сигурно прибежиште и место каде што одново и одново ги наоѓаше загубената имагинација и заскитаната фантазија кои постојано се кршеа како кораби од карпестиот брег на стварноста.